Dolubdur buludlar dolduğu qədər, Sisin, dumanındır, çənindir bu dağ, Aslanın, pələngin olduğu qədər Sənindir bu meşə, sənindir bu dağ.
Şən qırqovulları, şux turacları Bunca görməmişdim şad-xürrəm hələ, Əyən küləkdirmi bu ağacları, Ya təzim edirlər qarşında belə?!
Canına şəfalar gətirir bol-bol Kəkotu, itburnu, zəncəfil sənin, Dağların döşündə hər ağac, hər kol Qohum-əqrəbandır elə bil sənin.
Qoşul bu növrağa, dayanma kefsiz, Qurutsun zirvələr öz örpəyini, Inana bilmirəm bu qədər sevsin Meşə rəiyyəti meşəbəyini.
Gözdən keçirdikcə dərəni, diki, Ülvi gözəlliyə mat qalır insan, Qayalar onunçun vüqarlıdır ki, Dağların dalında sən dayanmısan!
|
