Dərd buğdadı, ürəyimsə qarışqa, Bu mən, bu da taleyimdir, tanış ol, Xəritədir alnımdakı qırışlar, Ərzi gəzib, dolanmışam neçə yol.
Gədiklərdə Tanrı özü qoruyub, Düzənlərdə büdrəyəndə gör məni, Yurd içində yağı mənə gor oyub- Niyə atmır dağ çiynindən yer məni?
Başbilənlər ayağımdan çəkiblər, İtirmişəm avandımı, tərsimi, Qırx arşınlıq bir quyuya əkiblər-
Bitməsinə güman yoxdur səsimin.
Çırpınıram qollarında təkliyin, Yaxınımda yer vermişəm yada mən, İnsafımın bəlasıdır çəkdiyim, Ürəyindən asılası adamam.
|
