Nazlana-nazlana keçdin yanımdan, Heç üzüm gülmədi evə gəlincə, Günəşdin könlümün asimanında, Devirdin zülməti evə gəlincə.
Bu incə məqamı Tanrımı seçdi, Sənsiz hər nə varsa, əbəsdi, heçdi, Elə bil yanımdan ilk bahar keçdi, Ətrin çəkilmədi evə gəlincə.
Məni görər-görməz halın dəyişdi, Döndün zəlzələyə, balın dəyişdi, Yanımdan keçəndə yolun dəyişdi, Nə çəkdim, bilmədin, evə gəlincə.
Sonasan, hüsnündə su gözəlliyi, Beləmi olurmuş qu gözəlliyi, Nə əcəb buraxdı bu gözəlliyi, Gözüm tökülmədi evə gəlincə.
Ayrılıq şığıdı, geri çəkildim, Qınaqdan çəkinib gözümü sildim, Yaxşı ki, ay gözəl, yeriyə bildim, Dizim bükülmədi evə gəlincə.
|
