Mətin oğullara yurd alqış deyir, Sərhəddə dayanan mərdlərə əhsən, Yəqin yanılmaram, sərhəddən deyil, Vətən sərhədçidən başlanır, desəm.
Hər əsgər bir sərhəd dirəyidimi, Tutduğu mövqedən çəkilməz geri, Yurd eşqi tikanlı məftillər kimi Bağlar bir-birinə sərhədçiləri.
Tükü-tükdən seçib sərhədçi gözü, Önündə ən qatı düşmən də susub, Atı Qıratların cinsinə, özü Qoç Koroğluların nəslinə mənsub.
Hər biri tarıxdir ötən anların, Yaşar xatirədə xoş növraq kimi, Üzü yad ellərə dayananların Durub arxasında Vətən dağ kimi.
Nifrəti dönəndə çağlayan selə, Zərbinə bir kimsə dayana bilməz, Müxənnət radardan gizlənsə belə, Sərhədçi gözündən yayına bilməz. |
