Saraylar bəzəyir qızılquş kimi Dam üstə dam olan Azərbaycanı, Kordur o gözlər ki, görə bilməyir Zülmətdə şam olan Azərbaycanı.
Haçan şimşəyini çaxan görürəm- Tanrını səmadan baxan görürəm, Yadları yandıran, yaxan görürəm Alovu vam olan Azərbaycanı.
Bülbüllər ötüşür qoynunda hər an, Vermir yağılara, yadlara aman, Yeni arzulara yetirir zaman Gözündə kam olan Azərbaycanı.
Şanlı keçmişində min tufan gördüm, Bayrağı üstündə qızıl qan gördüm, Nifrət üzərinə şığıyan gördüm, Sevgiyə ram olan Azərbaycanı.
Gözlərdən çən kimi çəkildikcə qəm, Zəfər nəğmələri bəstələr qələm, Parçalaya bilməz, tökülsə aləm Qəlbimdə tam olan Azərbaycanı.
|
