Mən unut deyirəm, ürək unutmur, Daha ürəyimdən küsmüşəm, gülüm, Ürəklə dostluğu, mehribanlığı Qəzəb qayçısıyla kəsmişəm, gülüm!
Mənalı-mənasız günlər ötüşür, Az qalır, gözümdə qəm çiçəkliyə, Köksümdə ürəyim yadıma düşür, Gözüm sataşanda bir ürəkliyə.
Ağardı dan yeri, səhər deyilmi, Qarışıq saçımda barmağım daraq, Ürəyim peşiman bir uşaq kimi Barışmaq istəyir, sızıldayaraq.
Ürəksiz yaşamaq... De, mümkünmü bu, Bunu necə dedim, qurusun dilim, Ürəklə dostluğu, mehribanlığı Mən sənin üstündə kəsmişəm, gülüm!
Bilirsən, ürəklə çarpışmaq əbəs... Atma insafını getmə uzağa, Hələ ki, gec deyil, əzizim tələs, Məni ürəyimlə barışdırmağa.
|
